محسن نقوی

[alone_leo82]

قتل چھپتے تھے کبھی سنگ کی دیوار کے بیچ​

محسن نقوی​

​

قتل چھپتے تھے کبھی سنگ کی دیوار کے بیچ ​

​

اب تو کھلنے لگے مقتل بھرے بازار کے بیچ ​

​

اپنی پوشاک کے چھن جانے پہ افسوس نہ کر ​

​

سر سلامت نہیں رہتے یہاں دستار کے بیچ ​

​

سرخیاں امن کی تلقین میں مصروف رہیں ​

​

حرف بارود اگلتے رہے اخبار کے بیچ ​

​

کاش اس خواب کی تعبیر کی مہلت نہ ملے ​

​

شعلے اگتے نظر آئے مجھے گلزار کے بیچ ​

​

ڈھلتے سورج کی تمازت نے بکھر کر دیکھا ​

​

سر کشیدہ مرا سایا صف اشجار کے بیچ ​

​

رزق ملبوس مکاں سانس مرض قرض دوا ​

​

منقسم ہو گیا انساں انہی افکار کے بیچ ​

​

دیکھے جاتے نہ تھے آنسو مرے جس سے محسنؔ ​

​

آج ہنستے ہوئے دیکھا اسے اغیار کے بیچ​

 

[alone_leo82]

معرکہ اب کے ہوا بھی تو پھر ایسا ہوگا​

محسن نقوی​

​

معرکہ اب کے ہوا بھی تو پھر ایسا ہوگا ​

​

تیرے دریا پہ مری پیاس کا پہرہ ہوگا ​

​

اس کی آنکھیں ترے چہرے پہ بہت بولتی ہیں ​

​

اس نے پلکوں سے ترا جسم تراشا ہوگا ​

​

کتنے جگنو اسی خواہش میں مرے ساتھ چلے ​

​

کوئی رستہ ترے گھر کو بھی تو جاتا ہوگا ​

​

میں بھی اپنے کو بھلائے ہوئے پھرتا ہوں بہت ​

​

آئنہ اس نے بھی کچھ روز نہ دیکھا ہوگا ​

​

رات جل تھل مری آنکھوں میں اتر آیا تھا ​

​

صورت ابر کوئی ٹوٹ کے برسا ہوگا ​

​

یہ مسیحائی اسے بھول گئی ہے محسنؔ ​

​

یا پھر ایسا ہے مرا زخم ہی گہرا ہوگا​

 

[alone_leo82]

خود اپنے دل میں خراشیں اتارنا ہوں گی​

محسن نقوی​

​

خود اپنے دل میں خراشیں اتارنا ہوں گی ​

​

ابھی تو جاگ کے راتیں گزارنا ہوں گی ​

​

ترے لیے مجھے ہنس ہنس کے بولنا ہوگا ​

​

مرے لیے تجھے زلفیں سنوارنا ہوں گی ​

​

تری صدا سے تجھی کو تراشنا ہوگا ​

​

ہوا کی چاپ سے شکلیں ابھارنا ہوں گی ​

​

ابھی تو تیری طبیعت کو جیتنے کے لیے ​

​

دل و نگاہ کی شرطیں بھی ہارنا ہوں گی ​

​

ترے وصال کی خواہش کے تیز رنگوں سے ​

​

ترے فراق کی صبحیں نکھارنا ہوں گی ​

​

یہ شاعری یہ کتابیں یہ آیتیں دل کی ​

​

نشانیاں یہ سبھی تجھ پہ وارنا ہوں گی​

 

[alone_leo82]

کٹھن تنہائیوں سے کون کھیلا میں اکیلا​

محسن نقوی​

​

کٹھن تنہائیوں سے کون کھیلا میں اکیلا ​

​

بھرا اب بھی مرے گاؤں کا میلہ میں اکیلا ​

​

بچھڑ کر تجھ سے میں شب بھر نہ سویا کون رویا ​

​

بجز میرے یہ دکھ بھی کس نے جھیلا میں اکیلا ​

​

یہ بے آواز بنجر بن کے باسی یہ اداسی ​

​

یہ دہشت کا سفر جنگل یہ بیلہ میں اکیلا ​

​

میں دیکھوں کب تلک منظر سہانے سب پرانے ​

​

وہی دنیا وہی دل کا جھمیلا میں اکیلا ​

​

وہ جس کے خوف سے صحرا سدھارے لوگ سارے ​

​

گزرنے کو ہے طوفاں کا وہ ریلا میں اکیلا​

 

[alone_leo82]

میں چپ رہا کہ زہر یہی مجھ کو راس تھا​

محسن نقوی​

​

میں چپ رہا کہ زہر یہی مجھ کو راس تھا ​

​

وہ سنگ لفظ پھینک کے کتنا اداس تھا ​

​

اکثر مری قبا پہ ہنسی آ گئی جسے ​

​

کل مل گیا تو وہ بھی دریدہ لباس تھا ​

​

میں ڈھونڈھتا تھا دور خلاؤں میں ایک جسم ​

​

چہروں کا اک ہجوم مرے آس پاس تھا ​

​

تم خوش تھے پتھروں کو خدا جان کے مگر ​

​

مجھ کو یقین ہے وہ تمہارا قیاس تھا ​

​

بخشا ہے جس نے روح کو زخموں کا پیرہن ​

​

محسنؔ وہ شخص کتنا طبیعت شناس تھا​

 

[alone_leo82]

وہ دلاور جو سیہ شب کے شکاری نکلے​

محسن نقوی​

​

وہ دلاور جو سیہ شب کے شکاری نکلے ​

​

وہ بھی چڑھتے ہوئے سورج کے پجاری نکلے ​

​

سب کے ہونٹوں پہ مرے بعد ہیں باتیں میری ​

​

میرے دشمن مرے لفظوں کے بھکاری نکلے ​

​

اک جنازہ اٹھا مقتل میں عجب شان کے ساتھ ​

​

جیسے سج کر کسی فاتح کی سواری نکلے ​

​

ہم کو ہر دور کی گردش نے سلامی دی ہے ​

​

ہم وہ پتھر ہیں جو ہر دور میں بھاری نکلے ​

​

عکس کوئی ہو خد و خال تمہارے دیکھوں ​

​

بزم کوئی ہو مگر بات تمہاری نکلے ​

​

اپنے دشمن سے میں بے وجہ خفا تھا محسنؔ ​

​

میرے قاتل تو مرے اپنے حواری نکلے​

 

[Sexy_dick_lhr]

بہترین اپڈیٹ
بھائی آپ ان کی سب شاعری پوسٹ کرو کیوں کے آپ اور میں ان کے شعر پوسٹ کر رھے ھیں
آپ نے بھی میرے والے کر دیے اس لیے آپ اس ٹریڈ کو جاری رکھو
اور میں طنز نہیں کر رہا دل سے کہہ رہا ہوں

 

[alone_leo82]

جب ہجر کے شہر میں دھوپ اتری میں جاگ پڑا تو خواب ہوا​

محسن نقوی​

​

جب ہجر کے شہر میں دھوپ اتری میں جاگ پڑا تو خواب ہوا ​

​

مری سوچ خزاں کی شاخ بنی ترا چہرہ اور گلاب ہوا ​

​

برفیلی رت کی تیز ہوا کیوں جھیل میں کنکر پھینک گئی ​

​

اک آنکھ کی نیند حرام ہوئی اک چاند کا عکس خراب ہوا ​

​

ترے ہجر میں ذہن پگھلتا تھا ترے قرب میں آنکھیں جلتی ہیں ​

​

تجھے کھونا ایک قیامت تھا ترا ملنا اور عذاب ہوا ​

​

بھرے شہر میں ایک ہی چہرہ تھا جسے آج بھی گلیاں ڈھونڈتی ہیں ​

​

کسی صبح اسی کی دھوپ کھلی کسی رات وہی مہتاب ہوا ​

​

بڑی عمر کے بعد ان آنکھوں میں کوئی ابر اترا تری یادوں کا ​

​

مرے دل کی زمیں آباد ہوئی مرے غم کا نگر شاداب ہوا ​

​

کبھی وصل میں محسنؔ دل ٹوٹا کبھی ہجر کی رت نے لاج رکھی ​

​

کسی جسم میں آنکھیں کھو بیٹھے کوئی چہرہ کھلی کتاب ہوا​

 

[alone_leo82]

یہ کہہ گئے ہیں مسافر لٹے گھروں والے​

محسن نقوی​

​

یہ کہہ گئے ہیں مسافر لٹے گھروں والے ​

​

ڈریں ہوا سے پرندے کھلے پروں والے ​

​

یہ میرے دل کی ہوس دشت بے کراں جیسی ​

​

وہ تیری آنکھ کے تیور سمندروں والے ​

​

ہوا کے ہاتھ میں کاسے ہیں زرد پتوں کے ​

​

کہاں گئے وہ سخی سبز چادروں والے ​

​

کہاں ملیں گے وہ اگلے دنوں کے شہزادے ​

​

پہن کے تن پہ لبادے گداگروں والے ​

​

پہاڑیوں میں گھرے یہ بجھے بجھے رستے ​

​

کبھی ادھر سے گزرتے تھے لشکروں والے ​

​

انہی پہ ہو کبھی نازل عذاب آگ اجل ​

​

وہی نگر کبھی ٹھہریں پیمبروں والے ​

​

ترے سپرد کروں آئنے مقدر کے ​

​

ادھر تو آ مرے خوش رنگ پتھروں والے ​

​

کسی کو دیکھ کے چپ چپ سے کیوں ہوئے محسنؔ ​

​

کہاں گئے وہ ارادے سخن وروں والے​

 

[alone_leo82]

سانسوں کے اس ہنر کو نہ آساں خیال کر​

محسن نقوی​

​

سانسوں کے اس ہنر کو نہ آساں خیال کر ​

​

زندہ ہوں ساعتوں کو میں صدیوں میں ڈھال کر ​

​

مالی نے آج کتنی دعائیں وصول کیں ​

​

کچھ پھول اک فقیر کی جھولی میں ڈال کر ​

​

کل یوم ہجر زرد زمانوں کا یوم ہے ​

​

شب بھر نہ جاگ مفت میں آنکھیں نہ لال کر ​

​

اے گرد باد لوٹ کے آنا ہے پھر مجھے ​

​

رکھنا مرے سفر کی اذیت سنبھال کر ​

​

محراب میں دیے کی طرح زندگی گزار ​

​

منہ زور آندھیوں میں نہ خود کو نڈھال کر ​

​

شاید کسی نے بخل زمیں پر کیا ہے طنز ​

​

گہرے سمندروں سے جزیرے نکال کر ​

​

یہ نقد جاں کہ اس کا لٹانا تو سہل ہے ​

​

گر بن پڑے تو اس سے بھی مشکل سوال کر ​

​

محسنؔ برہنہ سر چلی آئی ہے شام غم ​

​

غربت نہ دیکھ اس پہ ستاروں کی شال کر​