احمد فراز

[alone_leo82]

خاموش ہو کیوں داد جفا کیوں نہیں دیتے​

احمد فراز​

​

خاموش ہو کیوں داد جفا کیوں نہیں دیتے ​

​

بسمل ہو تو قاتل کو دعا کیوں نہیں دیتے ​

​

وحشت کا سبب روزن زنداں تو نہیں ہے ​

​

مہر و مہ و انجم کو بجھا کیوں نہیں دیتے ​

​

اک یہ بھی تو انداز علاج غم جاں ہے ​

​

اے چارہ گرو درد بڑھا کیوں نہیں دیتے ​

​

منصف ہو اگر تم تو کب انصاف کرو گے ​

​

مجرم ہیں اگر ہم تو سزا کیوں نہیں دیتے ​

​

رہزن ہو تو حاضر ہے متاع دل و جاں بھی ​

​

رہبر ہو تو منزل کا پتہ کیوں نہیں دیتے ​

​

کیا بیت گئی اب کے فرازؔ اہل چمن پر؟ ​

​

یاران قفس مجھ کو صدا کیوں نہیں دیتے​

 

[alone_leo82]

ایسے چپ ہیں کہ یہ منزل بھی کڑی ہو جیسے​

احمد فراز​

​

ایسے چپ ہیں کہ یہ منزل بھی کڑی ہو جیسے ​

​

تیرا ملنا بھی جدائی کی گھڑی ہو جیسے ​

​

اپنے ہی سائے سے ہر گام لرز جاتا ہوں ​

​

راستے میں کوئی دیوار کھڑی ہو جیسے ​

​

کتنے ناداں ہیں ترے بھولنے والے کہ تجھے ​

​

یاد کرنے کے لیے عمر پڑی ہو جیسے ​

​

تیرے ماتھے کی شکن پہلے بھی دیکھی تھی مگر ​

​

یہ گرہ اب کے مرے دل میں پڑی ہو جیسے ​

​

منزلیں دور بھی ہیں منزلیں نزدیک بھی ہیں ​

​

اپنے ہی پاؤں میں زنجیر پڑی ہو جیسے ​

​

آج دل کھول کے روئے ہیں تو یوں خوش ہیں فرازؔ ​

​

چند لمحوں کی یہ راحت بھی بڑی ہو جیسے​

 

[alone_leo82]

اس قدر مسلسل تھیں شدتیں جدائی کی​

احمد فراز​

​

اس قدر مسلسل تھیں شدتیں جدائی کی ​

​

آج پہلی بار اس سے میں نے بے وفائی کی ​

​

ورنہ اب تلک یوں تھا خواہشوں کی بارش میں ​

​

یا تو ٹوٹ کر رویا یا غزل سرائی کی ​

​

تج دیا تھا کل جن کو ہم نے تیری چاہت میں ​

​

آج ان سے مجبوراً تازہ آشنائی کی ​

​

ہو چلا تھا جب مجھ کو اختلاف اپنے سے ​

​

تو نے کس گھڑی ظالم میری ہم نوائی کی ​

​

ترک کر چکے قاصد کوئے نامراداں کو ​

​

کون اب خبر لاوے شہر آشنائی کی ​

​

طنز و طعنہ و تہمت سب ہنر ہیں ناصح کے ​

​

آپ سے کوئی پوچھے ہم نے کیا برائی کی ​

​

پھر قفس میں شور اٹھا قیدیوں کا اور صیاد ​

​

دیکھنا اڑا دے گا پھر خبر رہائی کی ​

​

دکھ ہوا جب اس در پر کل فرازؔ کو دیکھا ​

​

لاکھ عیب تھے اس میں خو نہ تھی گدائی کی​

 

[alone_leo82]

کیا ایسے کم سخن سے کوئی گفتگو کرے​

احمد فراز​

​

کیا ایسے کم سخن سے کوئی گفتگو کرے ​

​

جو مستقل سکوت سے دل کو لہو کرے ​

​

اب تو ہمیں بھی ترک مراسم کا دکھ نہیں ​

​

پر دل یہ چاہتا ہے کہ آغاز تو کرے ​

​

تیرے بغیر بھی تو غنیمت ہے زندگی ​

​

خود کو گنوا کے کون تری جستجو کرے ​

​

اب تو یہ آرزو ہے کہ وہ زخم کھائیے ​

​

تا زندگی یہ دل نہ کوئی آرزو کرے ​

​

تجھ کو بھلا کے دل ہے وہ شرمندۂ نظر ​

​

اب کوئی حادثہ ہی ترے روبرو کرے ​

​

چپ چاپ اپنی آگ میں جلتے رہو فرازؔ ​

​

دنیا تو عرض حال سے بے آبرو کرے​

 

[alone_leo82]

میں تو مقتل میں بھی قسمت کا سکندر نکلا​

احمد فراز​

​

دلچسپ معلومات​

مقطع کا شعر احمد فراز کے کتبے پر بھی درج ہے​

​

میں تو مقتل میں بھی قسمت کا سکندر نکلا ​

​

قرعۂ فال مرے نام کا اکثر نکلا ​

​

تھا جنہیں زعم وہ دریا بھی مجھی میں ڈوبے ​

​

میں کہ صحرا نظر آتا تھا سمندر نکلا ​

​

میں نے اس جان بہاراں کو بہت یاد کیا ​

​

جب کوئی پھول مری شاخ ہنر پر نکلا ​

​

شہر والوں کی محبت کا میں قائل ہوں مگر ​

​

میں نے جس ہاتھ کو چوما وہی خنجر نکلا ​

​

تو یہیں ہار گیا ہے مرے بزدل دشمن ​

​

مجھ سے تنہا کے مقابل ترا لشکر نکلا ​

​

میں کہ صحرائے محبت کا مسافر تھا فرازؔ ​

​

ایک جھونکا تھا کہ خوشبو کے سفر پر نکلا​

 

[alone_leo82]

تجھ سے بچھڑ کے ہم بھی مقدر کے ہو گئے​

احمد فراز​

​

تجھ سے بچھڑ کے ہم بھی مقدر کے ہو گئے ​

​

پھر جو بھی در ملا ہے اسی در کے ہو گئے ​

​

پھر یوں ہوا کہ غیر کو دل سے لگا لیا ​

​

اندر وہ نفرتیں تھیں کہ باہر کے ہو گئے ​

​

کیا لوگ تھے کہ جان سے بڑھ کر عزیز تھے ​

​

اب دل سے محو نام بھی اکثر کے ہو گئے ​

​

اے یاد یار تجھ سے کریں کیا شکایتیں ​

​

اے درد ہجر ہم بھی تو پتھر کے ہو گئے ​

​

سمجھا رہے تھے مجھ کو سبھی ناصحان شہر ​

​

پھر رفتہ رفتہ خود اسی کافر کے ہو گئے ​

​

اب کے نہ انتظار کریں چارہ گر کہ ہم ​

​

اب کے گئے تو کوئے ستم گر کے ہو گئے ​

​

روتے ہو اک جزیرۂ جاں کو فرازؔ تم ​

​

دیکھو تو کتنے شہر سمندر کے ہو گئے​

 

[alone_leo82]

اس کا اپنا ہی کرشمہ ہے فسوں ہے یوں ہے​

احمد فراز​

​

اس کا اپنا ہی کرشمہ ہے فسوں ہے یوں ہے ​

​

یوں تو کہنے کو سبھی کہتے ہیں یوں ہے یوں ہے ​

​

جیسے کوئی در دل پر ہو ستادہ کب سے ​

​

ایک سایہ نہ دروں ہے نہ بروں ہے یوں ہے ​

​

تم نے دیکھی ہی نہیں دشت وفا کی تصویر ​

​

نوک ہر خار پہ اک قطرۂ خوں ہے یوں ہے ​

​

تم محبت میں کہاں سود و زیاں لے آئے ​

​

عشق کا نام خرد ہے نہ جنوں ہے یوں ہے ​

​

اب تم آئے ہو مری جان تماشا کرنے ​

​

اب تو دریا میں تلاطم نہ سکوں ہے یوں ہے ​

​

ناصحا تجھ کو خبر کیا کہ محبت کیا ہے ​

​

روز آ جاتا ہے سمجھاتا ہے یوں ہے یوں ہے ​

​

شاعری تازہ زمانوں کی ہے معمار فرازؔ ​

​

یہ بھی اک سلسلۂ کن فیکوں ہے یوں ہے ​

​

​

 

[alone_leo82]

اب شوق سے کہ جاں سے گزر جانا چاہیئے​

احمد فراز​

​

اب شوق سے کہ جاں سے گزر جانا چاہیئے ​

​

بول اے ہوائے شہر کدھر جانا چاہیئے ​

​

کب تک اسی کو آخری منزل کہیں گے ہم ​

​

کوئے مراد سے بھی ادھر جانا چاہیئے ​

​

وہ وقت آ گیا ہے کہ ساحل کو چھوڑ کر ​

​

گہرے سمندروں میں اتر جانا چاہیئے ​

​

اب رفتگاں کی بات نہیں کارواں کی ہے ​

​

جس سمت بھی ہو گرد سفر جانا چاہیئے ​

​

کچھ تو ثبوت خون تمنا کہیں ملے ​

​

ہے دل تہی تو آنکھ کو بھر جانا چاہیئے ​

​

یا اپنی خواہشوں کو مقدس نہ جانتے ​

​

یا خواہشوں کے ساتھ ہی مر جانا چاہیئے​

 

[alone_leo82]

جب بھی دل کھول کے روئے ہوں گے​

احمد فراز​

​

جب بھی دل کھول کے روئے ہوں گے ​

​

لوگ آرام سے سوئے ہوں گے ​

​

بعض اوقات بہ مجبوریٔ دل ​

​

ہم تو کیا آپ بھی روئے ہوں گے ​

​

صبح تک دست صبا نے کیا کیا ​

​

پھول کانٹوں میں پروئے ہوں گے ​

​

وہ سفینے جنہیں طوفاں نہ ملے ​

​

ناخداؤں نے ڈبوئے ہوں گے ​

​

رات بھر ہنستے ہوئے تاروں نے ​

​

ان کے عارض بھی بھگوئے ہوں گے ​

​

کیا عجب ہے وہ ملے بھی ہوں فرازؔ ​

​

ہم کسی دھیان میں کھوئے ہوں گے​

 

[Sexy_dick_lhr]

بہت کمال جناب
مزید کا انتظار رہے گا