احمد فراز

[alone_leo82]

Shujriya mohtarram

 

[B.Ahmad]

سنا ہے لوگ اسے آنکھ بھر کے دیکھتے ہیں​

تو اس کے شہر میں کچھ دن ٹھہر کے دیکھتے ہیں​

​

سنا ہے ربط ہے اسکو خراب حالوں سے​

سو اپنے آپ کو برباد کر کے دیکھتے ہیں​

​

سنا ہے درد کی گاہک ہے چشم ناز اسکی​

سو ہم بھی اس کی گلی سے گزر کے دیکھتے ہیں​

​

سنا ہے اسکو بھی ہے شعر و شاعری سے شغف​

تو ہم بھی معجزے اپنے ہنر کے دیکھتے ہیں​

​

سنا ہے بولے تو باتوں سے پھول جھڑتے ہیں​

یہ بات ہے تو چلو بات کرکے دیکھتے ہیں​

​

سنا ہے رات اسے چاند تکتا رہتا ہے​

ستارے بام فلک سے اتر کے دیکھتے ہیں​

​

سنا ہے دن کو اسے تتلیاں ستاتی ہیں​

سنا ہے رات کو جگنو ٹھہر کے دیکھتے ہیں​

​

سنا ہے چشر ہیں اس کی غزال سی آنکھیں​

سنا ہے اسکو ہرن دشت بھر کے دیکھتے ہیں​

​

سنا ہے رات سے بڑھ کر ہیں کاکلیں اسکی​

سنا ہے شام کو سائے گزر کے دیکھتے ہیں​

​

سنا ہے اس کی سیاہ چشمگی قیامت ہے​

سو اسکو سرمہ فروش آہ بھر کے دیکھتے ہیں​

​

سنا ہے اس کے لبوں سے گلاب جلتے ہیں​

سو ہم بہار پہ الزام دھر کے دیکھتے ہیں​

​

سنا ہے آئینہ تمثال ہے جبیں اسکی​

جو سادہ دل ہیں اسے بن سنور کے دیکھتے ہیں​

​

بس اک نگاہ سے لٹتا ہے قافلہ دل کا​

سو راہ روانِ تمنا بھی ڈر کے دیکھتے ہیں​

​

رکے تو گردشیں اسکا طواف کرتی ہیں​

چلے تو اسکو زمانے ٹھہر کے دیکھتے ہیں​

​

کہانیاں ہی سہی سب مبالغے ہی سہی​

اگر وہ خواب ہے تو تعبیر کر کے دیکھتے ہیں​

​

اب اسکے شہر میں ٹھہریں کہ کوچ کرجائیں​

فراز آؤ ستارے سفر کے دیکھتے ہیں​

Lajavab faraz sab di awaz cha sun k maza a janada

 

[master007]

احمد فراز کی شاعری کا بہت عمدہ انتخاب۔

 

[alone_leo82]

جو غیر تھے وہ اسی بات پر ہمارے ہوئے​

احمد فراز​

​

جو غیر تھے وہ اسی بات پر ہمارے ہوئے ​

​

کہ ہم سے دوست بہت بے خبر ہمارے ہوئے ​

​

کسے خبر وہ محبت تھی یا رقابت تھی ​

​

بہت سے لوگ تجھے دیکھ کر ہمارے ہوئے ​

​

اب اک ہجوم شکستہ دلاں ہے ساتھ اپنے ​

​

جنہیں کوئی نہ ملا ہم سفر ہمارے ہوئے ​

​

کسی نے غم تو کسی نے مزاج غم بخشا ​

​

سب اپنی اپنی جگہ چارہ گر ہمارے ہوئے ​

​

بجھا کے طاق کی شمعیں نہ دیکھ تاروں کو ​

​

اسی جنوں میں تو برباد گھر ہمارے ہوئے ​

​

وہ اعتماد کہاں سے فرازؔ لائیں گے ​

​

کسی کو چھوڑ کے وہ اب اگر ہمارے ہوئے​

 

[alone_leo82]

یوں ہی مر مر کے جئیں وقت گزارے جائیں​

احمد فراز​

​

یوں ہی مر مر کے جئیں وقت گزارے جائیں ​

​

زندگی ہم ترے ہاتھوں سے نہ مارے جائیں ​

​

اب زمیں پر کوئی گوتم نہ محمد نہ مسیح ​

​

آسمانوں سے نئے لوگ اتارے جائیں ​

​

وہ جو موجود نہیں اس کی مدد چاہتے ہیں ​

​

وہ جو سنتا ہی نہیں اس کو پکارے جائیں ​

​

باپ لرزاں ہے کہ پہنچی نہیں بارات اب تک ​

​

اور ہم جولیاں دلہن کو سنوارے جائیں ​

​

ہم کہ نادان جواری ہیں سبھی جانتے ہیں ​

​

دل کی بازی ہو تو جی جان سے ہارے جائیں ​

​

تج دیا تم نے در یار بھی اکتا کے فرازؔ ​

​

اب کہاں ڈھونڈھنے غم خوار تمہارے جائیں​

 

[alone_leo82]

منتظر کب سے تحیر ہے تری تقریر کا​

احمد فراز​

​

منتظر کب سے تحیر ہے تری تقریر کا ​

​

بات کر تجھ پر گماں ہونے لگا تصویر کا ​

​

رات کیا سوئے کہ باقی عمر کی نیند اڑ گئی ​

​

خواب کیا دیکھا کہ دھڑکا لگ گیا تعبیر کا ​

​

کیسے پایا تھا تجھے پھر کس طرح کھویا تجھے ​

​

مجھ سا منکر بھی تو قائل ہو گیا تقدیر کا ​

​

جس طرح بادل کا سایہ پیاس بھڑکاتا رہے ​

​

میں نے یہ عالم بھی دیکھا ہے تری تصویر کا ​

​

جانے کس عالم میں تو بچھڑا کہ ہے تیرے بغیر ​

​

آج تک ہر نقش فریادی مری تحریر کا ​

​

عشق میں سر پھوڑنا بھی کیا کہ یہ بے مہر لوگ ​

​

جوئے خوں کو نام دے دیتے ہیں جوئے شیر کا ​

​

جس کو بھی چاہا اسے شدت سے چاہا ہے فرازؔ ​

​

سلسلہ ٹوٹا نہیں ہے درد کی زنجیر کا​

 

[alone_leo82]

وحشتیں بڑھتی گئیں ہجر کے آزار کے ساتھ​

احمد فراز​

​

وحشتیں بڑھتی گئیں ہجر کے آزار کے ساتھ ​

​

اب تو ہم بات بھی کرتے نہیں غم خوار کے ساتھ ​

​

ہم نے اک عمر بسر کی ہے غم یار کے ساتھ ​

​

میرؔ دو دن نہ جئے ہجر کے آزار کے ساتھ ​

​

اب تو ہم گھر سے نکلتے ہیں تو رکھ دیتے ہیں ​

​

طاق پر عزت سادات بھی دستار کے ساتھ ​

​

اس قدر خوف ہے اب شہر کی گلیوں میں کہ لوگ ​

​

چاپ سنتے ہیں تو لگ جاتے ہیں دیوار کے ساتھ ​

​

ایک تو خواب لیے پھرتے ہو گلیوں گلیوں ​

​

اس پہ تکرار بھی کرتے ہو خریدار کے ساتھ ​

​

شہر کا شہر ہی ناصح ہو تو کیا کیجئے گا ​

​

ورنہ ہم رند تو بھڑ جاتے ہیں دو چار کے ساتھ ​

​

ہم کو اس شہر میں تعمیر کا سودا ہے جہاں ​

​

لوگ معمار کو چن دیتے ہیں دیوار کے ساتھ ​

​

جو شرف ہم کو ملا کوچۂ جاناں سے فرازؔ ​

​

سوئے مقتل بھی گئے ہیں اسی پندار کے ساتھ​

 

[alone_leo82]

مثال دست زلیخا تپاک چاہتا ہے​

احمد فراز​

​

مثال دست زلیخا تپاک چاہتا ہے ​

​

یہ دل بھی دامن یوسف ہے چاک چاہتا ہے ​

​

دعائیں دو مرے قاتل کو تم کہ شہر کا شہر ​

​

اسی کے ہاتھ سے ہونا ہلاک چاہتا ہے ​

​

فسانہ گو بھی کرے کیا کہ ہر کوئی سر بزم ​

​

مآل قصۂ دل دردناک چاہتا ہے ​

​

ادھر ادھر سے کئی آ رہی ہیں آوازیں ​

​

اور اس کا دھیان بہت انہماک چاہتا ہے ​

​

ذرا سی گرد ہوس دل پہ لازمی ہے فرازؔ ​

​

وہ عشق کیا ہے جو دامن کو پاک چاہتا ہے​

 

[alone_leo82]

عجب جنون مسافت میں گھر سے نکلا تھا​

احمد فراز​

عجب جنون مسافت میں گھر سے نکلا تھا

​

​

خبر نہیں ہے کہ سورج کدھر سے نکلا تھا ​

​

یہ کون پھر سے انہیں راستوں میں چھوڑ گیا ​

​

ابھی ابھی تو عذاب سفر سے نکلا تھا ​

​

یہ تیر دل میں مگر بے سبب نہیں اترا ​

​

کوئی تو حرف لب چارہ گر سے نکلا تھا ​

​

یہ اب جو آگ بنا شہر شہر پھیلا ہے ​

​

یہی دھواں مرے دیوار و در سے نکلا تھا ​

​

میں رات ٹوٹ کے رویا تو چین سے سویا ​

​

کہ دل کا زہر مری چشم تر سے نکلا تھا ​

​

یہ اب جو سر ہیں خمیدہ کلاہ کی خاطر ​

​

یہ عیب بھی تو ہم اہل ہنر سے نکلا تھا ​

​

وہ قیس اب جسے مجنوں پکارتے ہیں فرازؔ ​

​

تری طرح کوئی دیوانہ گھر سے نکلا تھا​

 

[alone_leo82]

اے مرے بے درد شہر​

احمد فراز

​

دل سلگ اٹھتا ہے اپنے بام و در کو دیکھ کر ​

​

پھیلنے لگتی ہیں جب بھی شام کی پرچھائیاں ​

​

اس قدر ویران لمحے اس قدر سنسان رات ​

​

سوچ میں گم ہیں افق سے تا افق پہنائیاں ​

​

کس لیے روشن کروں دیوار و در کوئی تو ہو ​

​

گنگ دیواروں میں کیا ہوں انجمن آرائیاں ​

​

دور ہر شب جاگ اٹھتے ہیں کئی ماہ و نجوم ​

​

آگ بھڑکاتی ہیں سنگ و خشت کی رعنائیاں ​

​

راستوں سے خواب گاہوں تک مسلسل موج رنگ ​

​

جس طرح قوس قزح کی ٹوٹتی انگڑائیاں ​

​

زخم نظارہ لیے آنکھوں میں چپ تکتا رہا ​

​

گو مری نیندیں بھی مجھ سے لے اڑیں شہنائیاں ​

​

کل ذرا سی دیر چمکے تھے مرے دیوار و در ​

​

جھلملا اٹھی تھیں میری روح کی گہرائیاں ​

​

چند لمحوں کے لیے لو دے اٹھا تھا اک چراغ ​

​

اور دمک اٹھی تھیں کچھ لمحے مری تنہائیاں ​

​

آج اتنا شور کیوں ہے اے مرے بے درد شہر ​

​

ہر نظر میری طرف ہے اس قدر رسوائیاں​