آج کے منتخب اشعار

[master007]

مُقامِ شُکر، کہ اِس شہْرِ کج ادا میں بھی لوگ
لحاظِ حرفِ دلآویز و سادہ رکھتے ہیں

بنامِ فیض، بجانِ اسد فقیر کے پاس
جو آئے آئے، کہ ہم دِل کشادہ رکھتے ہیں

افتخارعارف

[master007]

آجائیں گے دُنیا میں کئی اور سُخنْور
لیکن کوئی شہزاد سا، پانے کے نہیں ہم

احسان تِری ذات پہ کیا کیا نہیں اُس کا
اُردو! یہ تُجھے گِن کے بتانے کے نہیں ہم

شفیق خلش

[master007]

ڈبو چُکا ہے اُمنگوں کو جِس کا سنّاٹا
بُلا رہا ہے اُسی بزْم سے قیاس ہمیں

احمد ندیم قاسمی

[master007]

مُعترِض ہو نہ مِری عُزلت و خاموشی پر
کیا کروں جبکہ کوئی محرمِ اسرار نہ ہو

اکبرالٰہ آبادی

[Haris1234]

کیا کہوں دل نے کہاں سینت کے رکھا ہے اُسے
نہ کبھی بُھولنے پاؤں، نہ مجھے یاد آئے

میں نے حافِظ کی طرح، طے یہ کِیا ہےعابد !
٠بعد ازِیں مے نہ خورم بے کفِ بزم آرائے٠

سیّدعابدعلی عابد

Wah boht zabardast

[master007]

دُکھ سے ہے عجَب ضعْف، خلِش جان پہ طاری
شاید، کہ مِلا غم اب اُٹھانے کے نہیں ہم


شفیق خلش

[master007]

ڈھب دیکھے تو ہم نے جانا، دل میں دُھن بھی سمائی ہے
میرا جی دانا تو نہیں ہے، عاشق ہے، سودائی ہے

صبح سویرے کون سی صُورت پُھلواری میں آئی ہے
ڈالی ڈالی جُھوم اُٹھی ہے، کلِی کلِی لہرائی ہے


میرا جی

[master007]

نیازِ عِشق کو سمجھا ہے کیا اے واعظِ ناداں !
ہزاروں بن گئے کعبے، جبِیں میں نے جہاں رکھ دی

اصغر گونڈوی

[master007]

الٰہی ! کیا کِیا تُو نے، کہ عالم میں تلاطم ہے
غضب کی ایک مُشتِ خاک زیرِ آسماں رکھ دی


اصغر گونڈوی

[master007]

مجھے سنے نہ کوئی مستِ بادۂ عشرت
مجاز ٹوٹے ہوئے دل کی اک صدا ہوں میں


اسرار الحق مجاز